In der zaecken, hangende voir den Hove ende Raiden s'Conincx, geordonneert deur zijne majeteyts landen van Utrecht, tusschen den heeren deken /
ende capittele van Sint Johans t'Utrecht, impetranten in cas van mainctenue ter eenre, ende Anthonis Jansz aen die heenstede , gedaechde ter andere zijden, d'impetranten /
proponerende dat zij onder andre huerluyden landen leggende hadden int Cleyn Vuylcoop in de gerechte van Vreeswijck, alias de Vaert, vijffden halve mergen lants, /
wesende weylant, ende gelegen aen twee campen bezijden den anderen, bepaelt in deser manieren, te weeten, streckende metten eenen eynde tot aen de caede die loopt /
langes een waterganck, genaempt Den Hoen, ende mitten anderen eynde tot aen twee andere campen lants die de gedaichde plach te beweyden, waeren mede /
aen d'een zijde van den den voorsz. twee campen lants gelegen sekere weylanden, den heeren van Sinte Marie t'Utrecht competerende, ende aen die anderee zijde zeeckere /
weylanden teocomende den erffgenamen van Dierck van Rossum, ofte dair zijluyden die metten rechte gelaten hebben, dat mede die voorsz. twee campen in /
haer viercante bepaelinge weylanden wesende bij eenen Aert Pauwelsz, der impetranten pachter alleen mit ossen geweyt waeren geweest over zekere lange /
jaere totten jaere 1556 incluys ende dat ten aensien ende wel weeten van den voirscreven gedaichde ende allen anderen omtrent den voirscreven landen connerserende /
verhuyrende die voirsz. pachten die naeweyde van den voirsz. twee campen denghene dien't hem beliefde, ende hoewel mitsdien nyemant georloft en was den /
impetranten te turberen in huerluyder duechdelicke possessie, t'hadde nochtans den gedaichde alhier belieft int beginzel van den somer van 1557 den bovensten van den /
voirsz. twee campen met zij koyen te beslaen ende beweyden, waeromme d'impetranten als wesende duer dien geturbeert in huerluyder oude ende duechdelicke possessie /
t'zelve den voirsz. Hove bij requeste te kennen gegeven hadden, versouckende ende obtinerende mandement in cas van mainctenue in forma, ende doende den gedaichde uuyt /
crachte vandien dachvaerden voor den voorsz. Hove t'eenen zekeren ende samelicken daeghe ten welcken dage dienende oft anderen dairvooren onderhouden d'impetranten geconcludeert hadden /
ten fyne zijluyden bij sententien van den voirsz. Hove gemaincteneert, gestijft ende gestarct zouden werden in de possessie vel quasi van den voirsz. twee campen lants, bepaetl als /
boven, omme deselvbe met beesten te beweyden, die naeweyde te vercopen ende alle proufyten van den voorsz. twee campen te genieten, als zij impetranten ende huerluyder pachters in den /
jaere 1556 ende daer te vooren altijt genoten ende geprofyteert hadden, ende dat voirts die voirsz. gedaichde zoude werden alle turbel, mett hynder ende letzel ter /
contrarie gedaen, costelooes ende scadeloes aff te doen ende hem te wachten van gelijcke meer te doen, mitsgaders den impetranten up te leggen ende betaelen alle alsulcke scaden ende interesten /
soe die gedaichde in den somer anno '56 hen impetranten ende hueren pachters int gebruyck ende weyden van de voirsz. twee campen gedaen hadde ende ahngende den processe noch doen soude, maickende /
voirts eysch van costen oft anders tot sulcken fynen ende conclusie als t'Hoff uuyter deductie van den processe bevinden zoude ende impetranten meest oirbaerlicxt te wesen, wairjegens /
den gedaichde voirsz. voir antwoirde hadde doen seggen, dat hij expresselick ontkende die rustige ende vrezaemige possessie bij den voorsz. impetranten geallegeert, want uuyt zijn gedaichdes /
eygendomsbrieven claerlicken bevonden zoude werden hem gedaichde te competeren die drie deelen van de vier deelen van de twee campen lants in questie, ende dat overzulcx dieselve /
landen in den jaere 1557 lestleden bij hem gedaichde ende des impetranten pachter t'samen gebruyct zijn geweest, sulcx dat genomen d'impetranten van tevooren enige andere possessie gehadt /
hadden (als neen) waeren dieselve daermede genouch te buyten gegaen, daerbeneffens hadde der impetranten pachter wel wetende geen rustige possessie van t'gene voirsz. es te hebben /
ter cause vandien zeer gequereleert, seggende dat hij metten weyen van den campe lants voirsz. nyet genouch en hadde voir zijn portie van parthie gemeen landen, waeromme hij gedaichde /
begerende denselven pachter eenichsins tevreden te stellen te dien verclaert hadde tevreden te wesen dat parthien voirtaen samen zouden weyden all achtervolgende elcx huer /
titule, zegel ende brieve, ontkennende mitsdien de gedaichde den impetranten den jaere 1556 voirleden in rustige possessie geturbeert te hebben van de voirsz. twee campen lants als hij oick mede voir /
zekeren commissaris van den voirsz. Hove daertoe bij denzelven Hove geordonneert bij eede ontkent hadde, concluderende mitsdien die gedaichde ten sijne bij sententien van den voirsz. Hove d'impetranten sonderlinge /
in de vougen ende manieren zijluyden procederen tot heuren eysch, fynen ende conclusien van mainctenue verclaert zouden werden nyet ontfanckelick ofte gefundeert ende indien zijl eenichsint ontfanckelick bevonden /
mochten werden (als neen), doende recht bij ordine dat hij gedaichde daervan geabsolveert zoude werden, maickende voirts eysch van costen, scaiden ende interesten ofte anders etc. /
d'ímpetranten replicerende deden seggen dat nemmermeer metter wairheyt bevonden zoude werden die twee campen lants in questie in den jaere 1557 bij huerluyder pachter ende den gedaichde alhier t'selve /
gebruyckt geweest te zijn, maer zoude wel ter contrarie vandien gedoceert werden dat d'selve twee campen bij der impetranten pachter in denzelven jaere van 1556 rustelick ende vredelick gebruyckt /
zijn geweest en dede insgelijcx nyet tot achterdeel van de impetranten dat die gedaichde wilde seggen dat hij der impetranten pachter die voirsz. lande in den jaere '57 t'samen geweyt hadden, gemerct /
die citiatie in cas van maintenue van den 28 Aprilis anno 1557 als men eersts begint te weyden ter excesse gestelt werden ende dariomme t'gheen naer dat van die bij hen gedaen was gheen /
possessie en conde smaicken vermits d'impetranten jegens hem contenderende waeren omme t'zelve ende gelicke turbel contraire huerluyder vresamige possessie gedaen affgedaen te hebben, persisterende /
mitsdien bij hueren eysch ende conclusie voor replycq, ende naridien die gedaichde (gelijck bij zijne eysche voir den Hove gepasseert, mitsgaders parthien ten beyden zijden van responsyven gedient hadden /
waerbij den voirsz. Hove zekere commissaris geordoneert omme inspectie locael te nemen, haer te doen maecken parthyen gethuygen horen ende alle doen dat de saecke uiyt eyschen soude, waernaer parthien /
voirsz. ter beyder zijden van vordere procedure gerenuncieert hebbende, hadden mede geemployeert reprochen ende salvatien van rechten in rechte geconcludeert ende ernstelick recht ende expeditie van justitie aen de /
Hove versocht ende begeert, t'Voorsz. Hoff, gesien t'voirsz. proces ende al dat bij dien gebleken es geconsidereert oick ende overgemerckt dat in desen behoirde geconsidereert ende overgemeckt te zijn ende dat /
heeft connen ende mogen gemoveren bij rijpe delibneratie van raiden , doende recht uuyten naem ende vanwegen Conincklicke Majesteyt, coninck van Spangien, hertoge van Brfabant, grave van Hollant ende /
erffheer der stadt, steden ende landen van Utrecht, heeft gemaincteneert ende maincteneert bij desen den voirsz. impetranten in den possessie vel quasi van den twee campen lants in questie, sulcx als /
die voiren bepaelt ende gesigneert staen, omme deselve met beesten te beweyden, de naeweyde te vercopen ende alle proufyten daervan te genieten als huerluyder pacht ende /
sij impetranten in de jaere 1556 lestleden ende daer te vooren genoten ende geprouffyteert hebben, condempnerende den gedaichde alle turbel ende letsel ter contrarie gedaen costeloes /
ende scadeloes aff te doen ende hem te wachten van gelijcke meer te doen, ende de impetranten te betaelen allen scaiden ende interesten als zijluyden duert ongebruyck van t'weyden van de voirsz. twee /
campen geleden hebben, mitsgaders in de costen van den porcesse tot taxactie van den Hove. Aldus gedaen ende gepronuncieert t'Utrecht onder t'zegel van justicie van den voirsz. Hove hieraen doen hangen /
[rest verdwijnt in de vouw]