Op huyden den achthienden Septembris sestien
hondert ende zeeven naer d'alde stile, verscheenen voor
mij Jacob van Herwaerden, openbaren notaris, bij den
Hove Provinciael t'Uytrecht geëdt ende toegelaten, binnen
Utrecht residerende, int bijweesen van de naebenoemde
getuygen hiertoe versocht, Willem Edmondt ende
Johan Scherp, beyde neeven van Wilent den gestrengen
eedelen heeren, heeren Willem Edmondt ridder ende colonel,
haerluyder oom, soe sijluyden mij duer meyster Robbert
Bethun, meyster chirurgijn van den regimente des selven
overleeden ridder bekent gemaeckt sijn, ende
verclaerden specialijcken geconstitueert ende machtich gemaeckt
te hebben, constitueerden ende maeckten specialijck machtich
mets deesen in de beste ende sterckste forme, soe sij datt nae
rechten ende gewoente consten ende mochten Gillebert
Simson, meede haerluyder neeve, hier tegenwoordich ende
den naebeschreeven last anneemende, omme in
haerluyder comparanten naemen van haeren wegen ende
tott hueren behoeve van Willem Edmondt, bailju
tot Steerlingh in Schotlandt indient hem goett ende
nodich ofte orbaer dunckt op te lichten haerluyder
comparanten elcx portie in drie duysent en sesshondert
merck geldts, bij den zaliger ridder Edmondt aen sijne vrunden
in Schotlandt besproken, hemluyden comparanten toecomende,
soe well in haere eygen naem als oick tgunt henluyden
duer overlijden van eenyge anderen aen de selve somme
geërft ende aenbestroven mach sijn, die hooftpenningen weerde
tott hunnen behoeve, t'zij aen den voornoemden Willem Edmondt
bailju ofte andere op behoirlijcke renth ofte interesse
te beleggen onder behoirlijcke ende genoechsaeme vestenis
ende sekerheytt, quitantie van de offlossinge te geeven ende
weeder nyewe brieven van constitutie te maeken,
passeren ende doen passeren, ende voorts generalijcken ende
specialijcken alles toe doen datt de gelegentheyt der /
saelven vereyschen sall ende tott haerluyder genoechsaeme
seekerheyt bevonden sall werden te behooren ende sijluyden
comparanten selffs doen souden mogen, al waert oeck datt
speciaelder macht daertoe van node waere wilde sijluyden
haeren gemachtichden gegeeven hebben mets deesen, mett
macht om ten selven erffecte een andere in sijne steede
te muegen stellen, gelijcke ofte minder macht hebbende,
gelovende in voller kracht ende weerde te sullen houden
ende doen houden allen tgunt bij haeren gemachtichden
voornoempt ende sijne voorsz. gestelden in de saeke
voersz. in ende buyten forme rechtens
gedaen ende gehandelt sall werden, bij goeder eer ende
vromicheyt ende voorts bij verbintenisse haerder personen ende
goederen onder bedwanck van allen rechteren mett vertichte
aller weeren ter contrarie, dies dat haeren gemachtichden
gehouden sall weesen van sijnen ende sijns gesubstitueerden
bedrijff ende ontfanck tott hunder comparanten vermaninge
te verandtwoorden, rekeninge, bewijs ende reliqua te doen
op ende van allen welcke die comparanten versochte een
ofte meer instrumenten in Latijnsche spraeke onder mijns
notary handt ende opgedruckten zegell verleent te worden,
die ick hemluyden gegonst ende belooft hebbe. Aldus gedaen
t'Uytrecht ten comptoire mijns notary, staende bij den stadts-
huyse, int bijweesen van mr. Robert Bethun voornt.
ende Cornelis Wouterss van Pleuresteyn, getuygen.
Willem Edmont
X Onderteyckent bij Jan Scherp
Mij notario present
Getuyghen:
Robert Bettoum
Cornelis van Pluyresteyn
H. van Herwaerden, notaris, 1607