Den 8e Septembris 1585
Compareerden etc. Catharina Heynaers, geboren van
Mechelen, oudt ontrent viertich jaren, tuychden
ende verclaerden bij forme van attestatie ter instantie ende
versueke van de eerbare discrete joncfrouwe
Geertruyt van Kessell, huysvrouwe Hermanius Medech,
dienaer des Goddelijcken Woorts in der kercke
t'Uytrecht, hier bevorens huysfrouwe van meyster
Herman van der Meer, warachtich te sijn, dat sij lange
jaren bij de voersz. jonckffrouwe Geertruyt, bij haere eerste
man ende ten tijde sij weduwe was, als dienstbode gewerkt
ende gedient heeft, ende is haer oversulcx kennelijck, heeft
gehoirt ende gesien dat dewijle sij bij die voorsz. jouffrouw Gedertruyt
van Kassell weduwe sijnde binnen Antwerpen in de
Lange Nyeustraet woonde die tijt als die
foicle van de duytsche soldaten binnen Antwerpen geschiet
was, ten huyse van haere jouffrouw voorsz. in de kueken
aldaer gecommen is Jan van der Meeren, haeres overleden
mans broeder, bij hem hebbende noch een manspersoon
die sij getuyge doenmael nyet en kenden, maer heeft
naderhandt verstaen dattet eenen notaris was, ende
vraechde hij Jan van der Meeren haer getuyge aff
off sij Cathelyna, haere zaliger meyster sijnen broeder
nyet en hadde hooren bekennen ende verclaren dat hij sijne
broeder Jan van der Meer voersz. nyet is eysschen en
hadde maer geheell van alles van hem voldaen was
ende dat sij daerop geandwoordt hebbende, dat sij t'selve
ofte sulcx haren meyster voornt. nyet en hadde horen
seggen ofte verclaren, is hij Jan van der Meere wech
gegaen, verclaerden noch sij getuyge, dat sij den voorn.
meyster Herman van der Merwen, uutlandich sijnde, ende
bij hem wonende, sich tot meermaels heeft horen beclagen
het ongelijck dat hij seyde dat sijne broeder Jan /
van der Meer hem deede angaende seeker goeden
ende juweele dat hij sulcx alles sijne huysvrouwe nyet all
en wilde openbaren om d'ongenoeche die hij daerin
soude hebben, maer mochte hij weder te lande comen
het soude sijne broeder duere juwele sijn ende dier-
gelijcke proposten, alle t'welcke ... ende
versochte etc. Actum ut supra ten huyse mijns notaris
ter presentie van Aert Anthonisz van Liemden ende
Jan Gherritsen, getuygen hiertoe versocht die deesen
mette compratanten ende mij onderteyckent hebben.
X Gestelt bij Catharyna voorsz. mij notaris present
Evert Anthonisz
Bij mijn Jan Gerritson
J. Herwaerden, notaris 1585